Deus, repulisti nos. After many afflictions, the church of Christ shall prevail.

[1] In finem. Pro his qui immutabuntur, in tituli inscriptionem ipsi David, in doctrinam, [2] cum succendit Mesopotamiam Syriae, et Sobal, et convertit Joab, et percussit Idumaeam in valle Salinarum duodecim millia. [3] Deus, repulisti nos, et destruxisti nos; iratus es, et misertus es nobis. [4] Commovisti terram, et conturbasti eam; sana contritiones ejus, quia commota est. [5] Ostendisti populo tuo dura; potasti nos vino compunctionis.

[6] Dedisti metuentibus te significationem, ut fugiant a facie arcus; ut liberentur dilecti tui, [7] salvum fac dextera tua, et exaudi me. [8] Deus locutus est in sancto suo: laetabor, et partibor Sichimam; et convallem tabernaculorum metibor. [9] Meus est Galaad, et meus est Manasses; et Ephraim fortitudo capitis mei. Juda rex meus; [10] Moab olla spei meae. In Idumaeam extendam calceamentum meum: mihi alienigenae subditi sunt.

[11] Quis deducet me in civitatem munitam? quis deducet me usque in Idumaeam? [12] Nonne tu, Deus, qui repulisti nos? et non egredieris, Deus, in virtutibus nostris? [13] Da nobis auxilium de tribulatione, quia vana salus hominis. [14] In Deo faciemus virtutem; et ipse ad nihilum deducet tribulantes nos.