Magnus Dominus. God is greatly to be praised for the establishment of his church.

[1] Psalmus cantici. Filiis Core, secunda sabbati. [2] Magnus Dominus et laudabilis nimis, in civitate Dei nostri, in monte sancto ejus. [3] Fundatur exsultatione universae terrae mons Sion; latera aquilonis, civitas regis magni. [4] Deus in domibus ejus cognoscetur cum suscipiet eam. [5] Quoniam ecce reges terrae congregati sunt, convenerunt in unum.

[6] Ipsi videntes, sic admirati sunt, conturbati sunt, commoti sunt. [7] Tremor apprehendit eos; ibi dolores ut parturientis: [8] in spiritu vehementi conteres naves Tharsis. [9] Sicut audivimus, sic vidimus, in civitate Domini virtutum, in civitate Dei nostri: Deus fundavit eam in aeternum. [10] Suscepimus, Deus, misericordiam tuam in medio templi tui.

[11] Secundum nomen tuum, Deus, sic et laus tua in fines terrae; justitia plena est dextera tua. [12] Laetetur mons Sion, et exsultent filiae Judae, propter judicia tua, Domine. [13] Circumdate Sion, et complectimini eam; narrate in turribus ejus. [14] Ponite corda vestra in virtute ejus, et distribuite domos ejus, ut enarretis in progenie altera. [15] Quoniam hic est Deus, Deus noster in aeternum, et in saeculum saeculi; ipse reget nos in saecula.