Paratum cor meum. The prophet praiseth God for benefits received.

[1] Canticum Psalmi, ipsi David. [2] Paratum cor meum, Deus, paratum cor meum; cantabo, et psallam in gloria mea. [3] Exsurge, gloria mea; exsurge, psalterium et cithara; exsurgam diluculo. [4] Confitebor tibi in populis, Domine, et psallam tibi in nationibus; [5] quia magna est super caelos misericordia tua, et usque ad nubes veritas tua.

[6] Exaltare super caelos, Deus, et super omnem terram gloria tua; [7] ut liberentur dilecti tui, salvum fac dextera tua, et exaudi me. [8] Deus locutus est in sancto suo: exsultabo, et dividam Sichimam; et convallem tabernaculorum dimetiar. [9] Meus est Galaad, et meus est Manasses; et Ephraim susceptio capitis mei. Juda rex meus, [10] Moab lebes spei meae; in Idumaeam extendam calceamentum meum; mihi alienigenae amici facti sunt.

[11] Quis deducet me in civitatem munitam? quis deducet me usque in Idumaeam? [12] nonne tu, Deus, qui repulisti nos? et non exibis, Deus, in virtutibus nostris? [13] Da nobis auxilium de tribulatione, quia vana salus hominis. [14] In Deo faciemus virtutem; et ipse ad nihilum deducet inimicos nostros.