Douay-Rheims DR + LV Latin Vulgate  
Latin Vulgate (Clementine)
< | Book Of Esther | >
< previous | Chapter 10 | next >
01  02  03  04  05  06  07  08  09  10  11  12  13  14  15  16

Assuerus's greatness. Mardochai's dignity.

[1] Rex vero Assuerus omnem terram, et cunctas maris insulas fecit tributarias: [2] cujus fortitudo et imperium, et dignitas atque sublimitas, qua exaltavit Mardochaeum, scripta sunt in libris Medorum, atque Persarum: [3] et quomodo Mardochaeus judaici generis secundus a rege Assuero fuerit: et magnus apud Judaeos, et acceptabilis plebi fratrum suorum, quaerens bona populo suo, et loquens ea, quae ad pacem seminis sui pertinerent. [4] Dixitque Mardochaeus: A Deo facta sunt ista. [5] Recordatus sum somnii, quod videram, haec eadem significantis: nec eorum quidquam irritum fuit.

[6] Parvus fons, qui crevit in fluvium, et in lucem, solemque conversus est, et in aquas plurimas redundavit: Esther est quam rex accepit uxorem, et voluit esse reginam. [7] Duo autem dracones: ego sum, et Aman. [8] Gentes, quae convenerant: hi sunt, qui conati sunt delere nomen Judaeorum. [9] Gens autem mea Israel est, quae clamavit ad Dominum, et salvum fecit Dominus populum suum: liberavitque nos ab omnibus malis, et fecit signa magna atque portenta inter gentes: [10] et duas sortes esse praecepit, unam populi Dei, et alteram cunctarum gentium.

[11] Venitque utraque sors in statutum ex illo jam tempore diem coram Deo universis gentibus: [12] et recordatus est Dominus populi sui, ac misertus est haereditatis suae. [13] Et observabuntur dies isti in mense Adar quartadecima, et quintadecima die ejusdem mensis, cum omni studio et gaudio in unum coetum populi congregati, in cunctas deinceps generationes populi Israel.

< previous | Chapter 10 | next >